विवाहको वहाना गरी जबरजस्ती करणी तथा ठगी गर्ने एक पक्राउ

विवाह गर्छु भनि ललाई फकाई जबरजस्ती करणी गरी विभिन्न धनमाल समेत ठगी गरी फरार रहेका एक जनालाई प्रहरीले पक्राउ गरेकाे छ ।

पक्राउ पर्नेमा चन्द्रागिरि नगरपालिका-६ बस्ने धादिङ सिद्धलेख गाउँपालिका-७ घर भएका ३० वर्षीय राजन बिश्वकर्मा भन्ने राजन सेन्चुरी रहेका छन् । उनलाई महानगरीय प्रहरी वृत थानकोटबाट खटिएको प्रहरीले आइतबार काठमाडौं चन्द्रागिरी नगरपालिका-६ थानकोट चेकपोष्टबाट  पक्राउ गरेको हो ।

घटनाको अनुसन्धान गर्ने क्रममा राजनले महिलालाई केही महिना अगाडि फोन गरी आफ्नो नाम राजन श्रेष्ठ बताइ भेटघाट गर्न बोलाएको र भेटघाटमा आफु अविवाहित पुरुष भएको बताएका थिए । भेटघाटमा राजनले विवाह गर्न राखेको प्रस्ताव स्विकार गरी उनीहरुले
प्रेम विवाह गरेर साउन १६ गते देखि २१ गतेसम्म थानकोट चेकपोष्टस्थित डेराकोठामा बसेकोप्रारम्भिक अनुसन्धानमा खुल्न आएको हो ।

साथै साउन २२ गते राजनलाई कोठामा नदेखि खोजी गर्दा दराजमा राखेको नगद २ लाख रुपैयाँ, १ तोला बराबरको सुनको सिक्री, १ तोला बराबरको सुनको रिङ र १ थान मोवाइल राखेको स्थानमा नभएको तथा निज राजन सम्पर्क विहिन भएका थिए ।

राजन उपर मुलुकी अपराध संहिता, २०७४ बमोजिम जबरजस्ती करणी तथा ठगी कसूरमा थप अनुसन्धान भइरहेको महानगरीय प्रहरी वृत थानकोटले जनाएको छ ।