‘फिल्मी शैली’मा लुटपाट

भक्तपुरको सुर्यविनायक—८ गणेश चोकस्थित मनोहर बस्नेतको घरमा डेरा गरी बस्ने रामबहादुर तामाङको कोठाबाट १६ लाख बढी लुटपाट गर्ने लुटेराहरुको पेशेवर समूह प्रहरी फन्दामा परेको छ ।

मंगलबार लुटपाटमा संलग्न ८ जनामध्ये ४ जनालाई बौद्धबाट पक्राउ गरिएको महानगरीय अपराध अनुसन्धान महाशाखाका प्रहरी निरिक्षक भरत थापाले बताए ।

प्रहरीले लुटपाट गर्ने समूहका भोजबहादुर थापामगर, मिलन भन्ने रत्नबहादुर तामाङ, विष्णु भन्ने अमृत तामाङ र सानुकान्छा ब्लोन पक्राउ गरेको हो । लुटपाटमा संलग्न टोकल भन्ने रोहितबहादुर थापामगर, बाइवा भन्ने दीर्घबहादुर तामाङ र विनोद तामाङ भने अझै फरार रहेको प्रहरीले जनाएको छ ।

१० माघको राति २ बजे उनीहरुले भक्तपुर सूर्यविनायक—८ गणेशचोकमा रहेको मनोहर बस्नेतको घरमा डेरा गरी बस्ने रामबहादुर तामाङको डेरामा प्रवेश गरी पेस्तोल देखाएर ज्यान मार्ने धम्की दिएर नियन्त्रणमा लिई लुटपाट गरेका थिए । उनीहरुले नगद तथा सुनका गरगहना गरी झण्डै १६ लाख ७ हजार बराबरको धनमाल लुटेका थिए ।

प्रहरीले पक्राउ परेकाहरुबाट पगालेको सुनको डिक्का ६ तोला, नोकिया मोबाइल १ थान, बा८३प ३७७३ नम्बरको रातो एफजेड मोटरसाइल र पीडितको घरबाट लगिएको एक थान ज्याकेट समेत बरामद गरेको छ । उनीहरुलाई अपराध महाशाखाले थप अनुसन्धानका लागि भक्तपुर प्रहरी परिसरमा पठाएको छ ।

प्रारम्भिक अनुसन्धानका क्रममा उनीहरुमध्ये भोजबहादुर थापा, रत्नबहादुर तामाङ यसअघि पनि विभिन्न डाँका तथा चोरीमा संलग्न भएकाले जेल समेत परिसकेका व्यक्ति हुन् । भोजबहादुर र रत्नले ०७४ सालमा गणतन्त्रको दिवसका अवसरमा जेल छुट पाएका थिए ।