उपप्रधान तथा गृहमन्त्रीमा रवि लामिछाने नियुक्त

उपप्रधान तथा गृहमन्त्रीमा रवि लामिछाने नियुक्त हुनुभएको छ।

पुष्पकमल दाहाल प्रचण्ड नेतृत्वको नयाँ सरकार गठन भएपछि रास्वपाका संसदीय दलका नेता लामिछाने उपप्रधान तथा गृहमन्त्रीमा नियुक्त हुनुभएको हो। चितवन २ बाट चुनाव जितेका लामिछानेलाई सोमबार प्रधानमन्त्री ‘प्रचण्ड’ले गृहमन्त्रीमा नियुक्त गर्नु भएको हो। उनीमाथि अमेरिकी नागरिकता त्याग नगरी झुटा विवरण पेश गरेर नेपाली राहदानी बनाएको आरोपमा प्रहरीले अनुसन्धान गरिरहेको छ।

कसैले झुटा विवरण दिएर राहदानी वा यात्रा अनुमति लिने वा लिने प्रयत्न गरेमा पनि कानुनले सजाय तोकेको छ। यसलाई फौजदारी कसुर मानिन्छ।

राहदानी ऐन २०७६ को दफा २१ (क) मा झुटा विवरण दिई राहदानी लिन नहुने उल्लेख छ। यदि लिएमा भने दफा २२ बमोजिम दुई लाखदेखि पाँचलाख रूपैयाँसम्म जरिवाना वा एकवर्षदेखि ३ वर्षसम्म कैद सजाय वा दुवै सजाय हुने कानुनी व्यवस्था छ।

विदेशी नागरिकता त्याग्नु भन्दा पहिलै नेपाली राहदानी लिएको अनुसन्धानबाट देखिए लामिछानेलाई जरिवाना र कैद सजाय हुन सक्छ।